དུས་རབས་སྔོན་མའི་ལོ་རབས་བརྒྱད་བཅུའི་ནང་དུ། བོད་ཀྱི་ས་ཁུལ་ནས་ས་གནས་ཁྲིམས་སྲོལ་དང་སྲོལ་ཡིག་སོགས་བཟོ་བའི་འགོ་བརྩམས་པ་རེད། སྐབས་དེར་བོད་ལ་བོད་ཡིག་ཤེས་པའི་ཁྲིམས་ལུགས་མི་སྣ་ཤིན་ཏུ་དཀོན་པའི་རྒྱུ་མཚན་གྱི་དབང་གིས། དེའི་སྐབས་སུ་བཟོས་བའི་ཁྲིམས་ཡིག་ཕལ་ཆེ་བ་གཞན་ལ་ལད་ཟློས་བྱས་ཏེ་འདྲ་བཤུ་བྱེད་དགོས་བྱུང་ཞིང་། ཁྲིམས་ཡིག་གི་ནང་དོན་དང་གཏན་འཁེལ་ཡང་ཆེ་ལོང་ཙམ་ཡིན་པ་མ་གཏོགས་ཕྲ་ཞིང་ཞིབ་པ་ཞིག་གཏན་འཁེལ་བྱས་མེད། རང་རང་གི་ས་གནས་ཀྱི་གནས་བབ་དང་མཐུན་རྐྱེན། ཆུ་ཚད་སོགས་ལ་བསམ་བློ་ཞིབ་ཚགས་མ་བཏང་བར་བཟོས་བའི་ཁྲིམས་ཡིག་དེ་དག་བོད་ཀྱི་སྤྱི་ཚོགས་དངོས་ཀྱི་འཚོ་བ་དང་ཧེ་བག་ཆེ་བའི་གནད་དོན་མང་བོ་བྱུང་།
གནད་དོན་མང་ཞིང་ཐོབ་ཐང་སོར་ཆུད་ཀྱི་ཐབས་ལམ་ཉུང་བའི་ཉེས་དམིགས་བདོག་པའི་རྐྱེན་གྱིས། བོད་ཀྱི་ས་གནས་སྲིད་གཞུང་དང་ཁྲིམས་ཁང་སོགས་ཀྱིས་ས་གནས་ཀྱིས་བཟོས་བའི་ཁྲིམས་ཡིག་ཕལ་ཆེ་བ་བེད་སྤྱོད་བྱེད་གིན་མེད། དཔེར་ན། དེ་སྔོན་གྱི་ཁྲིམས་ཡིག་གི་ནང་དུ་ཁྲོམ་དང་ཚོགས་རྫས་དང་ཐམ་ག་སོགས་སུ་བོད་ཡིག་བེད་སྤྱོད་བྱེད་དགོས་ཞེས་རོབ་ཙམ་གཏན་ཏུ་འཁེལ་ཡོད་པ་མ་གཏོགས། ཇི་ལྟར་བེད་སྤྱོད་བྱེད་པ་དང་། བེད་སྤྱོད་མ་བྱས་པའམ་ལོག་སྤྱོད་བྱས་ཏེ་ཁྲིམས་འགལ་ཀྱི་གནས་ཚུལ་བྱུང་ན་ཆད་པ་ཇི་ལྟར་གཅོད་པ་སོགས་ཀྱི་ཐད་ལ་གཏན་འཁེལ་བྱས་མེད།
༢༠༡༧་ལོའི་ཟླ་བཞི་བ་ཡི་ནང་དུ། ཆབ་མདོ་གྲོང་ཁྱེར་མི་དམངས་སྲིད་གཞུང་གིས་༼ཆབ་མདོ་གྲོང་ཁྱེར་བོད་ཡིག་སྤྱི་ཚོགས་སྤྱོད་ཡིག་དོ་དམ་ཐབས་ཚུལ་༽ཞེས་པའི་ས་གནས་སྲིད་འཛིན་རང་བཞིན་ཅན་གྱི་སྒྲིག་སྲོལ་ཞིག་བཟོས་ནས་གསལ་བསྒྲགས་བྱས་ཤིང་། ཁྲིམས་དེ་ད་ལོའི་ཟླ་༦་པའི་ཚེས་༡་ནས་བཟུང་ལག་བསྟར་བྱེད་ཀྱི་ཡིན་ཟེར། སྤྱི་ཚོགས་སྤྱོད་ཡིག་ཅེས་བ་ནི་ཁྲོམ་དང་སྤྱི་ཚོགས་ལ་དམིགས་ནས་བེད་སྤྱོད་བྱེད་པའི་ཡི་གེ་ལ་གོ་དགོས། དཔེར་ན་ཚོང་ཁང་གི་སྒོ་བྱང་དང་སྲིད་གཞུང་གི་ཐེམ་ག་དང་ཚོང་རྫས་ཀྱི་གསལ་བཤད་ལ་སོགས་པ་ལྟ་བུ་ལ་སྤྱི་ཚོགས་སྤྱོད་ཡིག་ཟེར་གིན་ཡོད། ཁྱོན་བསྡོམས་པའི་དོན་ཚན་བཅུ་གཉིས་ཡོད་པའི་ཆབ་མདོ་སྲིད་གཞུང་གི་སྒྲིག་སྲོལ་དེ་ནི་ཆབ་མདོ་གྲོང་ཁྱེར་གྱི་སྤྱི་ཚོགས་ཀྱི་སྟེང་དུ་བོད་ཡིག་ཇི་ལྟར་བཀོལ་སྤྱོད་བྱེད་པ་ལ་ལམ་སྟོན་དང་སྟངས་འཛིན་བྱེད་པའི་ཁྲིམས་སྲོལ་ཞིག་ཡིན་ལ། བོད་རང་སྐྱོང་ལྗོངས་ཀྱིས་༡༩༨༨་ལོར་བཟོས་ཤིང་༢༠༠༢་ལོར་བཟོས་བཅོས་བྱས་པའི་༼བོད་རང་སྐྱོང་ལྗོངས་ཀྱི་བོད་སྐད་ཡིག་སློབ་སྦྱོང་དང་བཀོལ་སྤྱོད། དར་སྤེལ་ཐད་ཀྱི་གཏན་འཁེལ་༽ཞེས་པའི་བོད་སྐད་ཡིག་རང་སྐྱོང་སྲོལ་ཡིག་གི་དོན་ཚན་༡༡་དང་༡༢་ཀྱི་སྤྱི་ཚོགས་སྤྱོད་ཡིག་གི་གཏན་འབེབས་དེ་ཆབ་མདོ་ས་ཁུལ་ནས་མངོན་གྱུར་དང་ལག་བསྟར་བྱེད་པའི་ཆེད་དུ་བཟོས་བའི་ས་གནས་་སྲིད་གཞུང་གི་སྒྲིག་སྲོལ་འཐུས་ཚང་བ་ཞིག་ཀྱང་ཡིན། ད་ལྟ་ཆབ་མདོ་ས་ཁུལ་སྲིད་གཞུང་གིས་བཟོས་བའི་ཁྲོམ་ངོ་སོགས་ཀྱི་བོད་ཡིག་འབྲི་སྟངས་དོ་དམ་དང་སྟངས་འཛིན་བྱེད་པའི་ཁྲིམས་འདི་ནི་བོད་ཡིག་དང་ཁྲིམས་ལུགས་རིག་པ་གཉིས་ཆ་ཤེས་པའི་བོད་ལྗོངས་ཀྱི་ཤེས་ཡོན་ཅན་དང་ཁྲིམས་བཟོ་མི་སྣ་སོགས་ཟུང་འབྲེལ་གྱིས་བཟོས་པ་ཞིག་ཡིན་པས། དེང་རབས་ཁྲིམས་ལུགས་ཀྱི་ཁྱད་ཆོས་དང་དགེ་མཚན་ཕལ་ཆེ་བ་ཚང་བ་མ་ཟད། དེང་སྐབས་བོད་ཀྱི་སྤྱི་ཚོགས་ཀྱི་ཁྲོད་དུ་བོད་ཡིག་ཕྱིན་ཅི་ལོག་པའི་སྒོ་ནས་བེད་སྤྱོད་བྱེད་བཞིན་པའི་སྤྱི་ཚོགས་གནད་དོན་ལ་དམིགས་ནས་སྣང་ཚུལ་ངན་པ་དེ་དག་གཏན་འགོག་གི་ནུས་པ་ཡང་འབྱུང་ངེས་ཡིན། དཔེར་ན་ཁྲིམས་དེའི་དོན་ཚན་༡༡་གི་ནང་དུ་ཁྲིམས་འགལ་གྱི་བྱ་སྤྱོད་ཅི་ཞིག་ཡིན་པ་དང་དེ་ལ་དཔག་པའི་ཆད་པ་ཇི་ལྟར་གཅོད་དགོས་བ་སོགས་གཏན་འཁེལ་བྱས་ཡོད་པ་མ་ཟད། སློབ་གྲྭ་དང་ལས་ཁུངས་སོགས་ཀྱི་འགན་འཁྲུ་ཡང་ཁ་གསལ་བར་གཏན་འཁེལ་བྱས་ཡོད་པ་ལྟ་བུའོ།
མདོར་ན། བོད་ཀྱི་རང་སྐྱོང་ས་ཁུལ་གཞན་གྱི་ཁྲིམས་བཟོའི་དབང་ཐང་ཡོད་པའི་རང་སྐྱོང་ཁུལ་སྲིད་གཞུང་གིས་ཀྱང་ཆབ་མདོ་གྲོང་ཁྱེར་མི་དམངས་སྲིད་གཞུང་གི་ཁྲོམ་ངོ་སོགས་ཀྱི་བོད་སྐད་ཡིག་བེད་སྤྱོད་ཀྱི་ཆེད་དུ་བཟོས་བའི་སྒྲིག་སྲོལ་དེ་མིག་དཔེ་རུ་བཟུང་ནས། རང་གི་སྲིད་འཛིན་ས་ཁུལ་གྱི་ཁྲོམ་ངོ་སོགས་ཀྱི་བོད་ཡིག་དག་ཐེར་བྱས་ཏེ་ཚད་ལྡན་དུ་བཏང་ན་བོད་ཡིག་གི་སྤྱི་ཚོགས་སྤྱོད་ཡིག་ཚད་ལྡན་ཡོང་བ་ལ་ཕན་པ་མ་ཟད། དངོས་ཤུགས་བརྒྱུད་གསུམ་གྱི་སྒོ་ནས་བོད་ཡིག་དར་སྤེལ་དང་བཀོལ་སྤྱོད་ལ་ཤིན་ཏུ་བྲིན་པའི་ལས་དོན་རླབས་ཆེན་ཞིག་ཡིན།
